Rusiye tahqiqatçıları Andriy Artemenko, Andriy Eyder, Vasıl Soroka ve Serğiy Çuliba ukrain deñizcilerni eki kün devamında - yanvar 30 ve 31-inde - sorğuğa çekti. Bu hususta Nikolay Polozov Facebook saifesinde yazdı.
“Sorğu devamında cenk esirleri 1949 senesi avgust 12-sinden “Cenk esirlerine munasebet qaideleri” üçünci Jeneva konventsiyasınıñ 17-nci maddesine köre cevaplandı. Amma bundan ğayrı, cenk esirleri sağlıq alları aqqında suallerge cevaplandı. Arbiylerniñ advokatları, olarnı Ukraina ya da başqa çet memlekette hastahanege qoyıp, tibbiy baqıluvı aqqında mahkemege muracaat yolladı”, - qayd etti Polozov.
O, qalğan deñizcilerge qarşı tahqiqat tedbirleri kelecek afta keçirilecegini de qoştı.
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
