Rusiye sıñırcıları iyünniñ 20-nde saba erte saatlarından berli Qırım ve Herson vilâyetiniñ memuriy sıñırındaki «Canköy» keçiş noqtasında yarımadağa kirmege tırışqan qırımtatarını tuta.
Bu aqta qırımtatar faali Nariman Celâl Qırım.Aqiqat mühbirine tarif etti.
«Saba beşten ya da beş buçuqtan berli keçiş noqtasında Rusiye FSBsiniñ sıñır hızmeti Kemal Kurbedinovnı tuta. O, 1894 senesi doğdı, qırımtatarı, Özbekistan vatandaşı, yaqında ameliyat olğan babasını ziyaret etmek içün Qırımğa kirmege tırıştı. Onıñ sağlığını baqacaq edi», – dep bildirdi Celâl.
Onıñ malümatına köre, Kemal Kurbedinov bayağı vaqıt tutula ve bu qasevetlendire, o, tuvğanlarına «er şey yolunda olğanını» bildirip oldı.
«Yarım saat evelsi er şey yahşı olğanını, özü kelecegini tuvğanlarına bildirip yetiştirdi. Faqat onı yiberdilermi ya da yoq şimdilik malümat yoq. Tutulmasınıñ sebebi ne olğanını tahmin etmek zor, koronavirus sebebinden kirsetilgen sıñırlavlar olğanını tahmin ete bilem. Al-azırda Qırımda qayd olmağan ve Ukraina vatandaşlığı olmağan insan Qırımğa kire bilemi? Menim malümatıma köre, böyle insanlar kirsetilmey, amma belli bir sebebi bar olğanı içün anda bir qarar alınır, dep tüşünem», – dedi Celâl.
O, er adamğa yarımadağa kirmege izin berilir, dep ümüt ete.
Rusiye FSBsiniñ sıñır hızmeti bu vaziyetni izaatlamay.
Mayısnıñ 23-nde haber etilgenine köre, Rusiye quvetçileri Qırım ve esas Ukrainanıñ memuriy sıñırında esli-başlı qırımtatarı Dilâver Memetovnı eki kere tuttı.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
