Ukraina Mudafaa nazirligi Baş istihbarat idaresiniñ vekili Vadim Skibitskiy emin ki, Rusiye Suriyede cenkleşmek içün işğal etilgen Qırımnı qullana.
Bu aqta o, «Obozrevatel» neşirine intervyü berip ayttı.
«Rusiye Qırımnı bir noqta olaraq küçni köstermek içün tek Qara deñiz regionımızda degil, Rusiye ordusını Suriyede qullanmaq içün esas baza olaraq qullana», – dep qayd etti Skibitskiy.
Onıñ bildirgenine köre, yarımadada Rusiye ordusınıñ yerleştirilüvi esas Ukraina içün de telükeli ola.
«Bizim içün de telüke arta. Yarımada şimalindeki uçaq ve vertolötlar ava-desant ordusınen beraber toprağımızda ücüm tedbirlerini kerçekleştire bile. Bunı Qırımda keçirilgen Rusiye ordusınıñ azırlığından köremiz», – dep ayttı Ukraina istihbaratınıñ temsilcisi.
Ukraina Mudafaa nazirligi Baş istihbarat idaresiniñ vekili Vadim Skibitskiyniñ bildirgenine köre, işğal altındaki Qırımda Rusiye arbiyleriniñ sayısı altı yıl içinde 2,5 qat arttı – 10-12 biñden 32,5 biñge qadar.
2019 senesi noyabr ayında Ukraina Mudafaa nazirligi, Qırımda Rusiye arbiyleriniñ sayısı arta, dep qayd etken edi.
Ukraina Mudafaa naziri Andriy Zagorodnük, Rusiye işğal etilgen Qırımnı askeriyleştirmege devam ete dep qayd etken edi, amma Ukraina arbiyleri bilmegen «kritik quvetleştirüvni» körip olamadı.
BM Baş Assambleyası 2019 senesi dekabr ayında Rusiyeni işğal etilgen Qırımdan ordusını çıqarmasına ve Ukraina toprağınıñ vaqtınca işğalini toqtatmasına çağırğan qararnı qabul etti.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
