Rusiye reaktiv dronı Sumı şeerinde doquz qatlı evge ücüm etti, dördü bala olğan altı kişi yaralandı, dep bildirdi Ukrayina Devlet fevqulâde vaziyetler hızmeti.
"Duşman ateşi sebebinden alış-veriş merkezinde büyük yanğın çıqtı. Qurtarıcılar ateşni söndürmege başlağanda duşman tekrar darbe endire edi. Ücümlerden biri vaqtında hızmet arabası yoq etildi ve Devlet fevqulâde vaziyetler hızmetiniñ bir naqliyat vastası zarar kördi… Telükesizlik vaziyeti pek qıyın ve tekrar darbe telükesi devam etkenine baqmadan, Devlet fevqulâde vaziyetler hızmetiniñ hadimleri ücüm aqibetlerini yoq etmege ve insanlarğa yardım emtege devam ete", – dep aytıla haberde.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.