Sumı şeerinde mayısnıñ 6-nda Rusiyeniñ vatandaş infrastrukturasına qarşı endirgen darbesi neticesinde üç kişi elâk oldı, dep haber ete şeer akimiyeti.
«Üç kişi elâk oldı: bir qadın – adise yerinde, erkek ve oğlançıq hastahanede can bergenler», – dep yazdı Telegramda şeer yolbaşçısı vazifelerini eda etken Artem Kobzar.
İlk malümatqa köre, darbe ballistik raketanen endirildi.
Bundan evel elâk olğan 20 yaşında qadın ve yedi yaralanğan, şu cümleden balalar aqqında haber etildi.
Sumı vilâyetiniñ arbiy memuriyet yolbaşçısı Oleg Grigorov yaralanğan bir bala pek ağır alda buluna, dep bildirdi.
Ukrayina fevqulâde vaziyetler devlet hızmeti yaralanğan 11 kişi, şu cümleden 5 bala aqqında bildirdi.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, tınç ealini öldürgenine, hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
