Cumaaqşamı künü 19 yaşında genç adam Blagoveşçenskniñ Amursk kollecinde odalardan birinde ateş açtı, bir kişi öldi, daa üç kişi yaralandı, dep bildire Sibir.Realii «Amur.info» agentliginiñ malümatına esaslanıp.
Yerli sağlıq nazirligi yaralanğanlardan biri ağır alda buluna, dep qayd ete.
Neşir mühbiri yaralanğanlardan birini acele yardım maşinası alıp ketti, dep bildirdi. Şeer merkezini politsiya sarıp aldı. Qaza yerinde politsiya ve OMON çalışalar.
Yerli kütleviy haber vastaları ateş açqan kişi 18 yaşında edi, dep bildire. O, oquv yurtunıñ üçünci qatındaki odada tüfekten ateş açtı. Student aqqında «adiy, yuvaş biri» olğanını aytalar. Şaatlarnıñ aytqanına köre, ders vaqtında student kenefke çıqıp, tüfeknen qayttı.
Atış vaqtında odada 20 kişi bar edi, aman-aman bütün gruppa. Ateş açılğanda talebeler tarqaldı, eşyaları odada qaldı. Regional İç işler nazirligi oğlan elâk oldı, dep bildirdi. Tasdıqlanmağan malümatqa köre, student özüni öldürdi. Silâ ateş açqan insannıñ adına qayd etilgen edi. Rusiye Tahqiqat komiteti köllecdeki atış sebebinden dava açtı.
Böyle bir facia Rusiye işğal etken Qırımda da olğan edi. 2018 senesi oktâbrniñ 17-nde Keriç politehnik kollecinde atış ve patlavlar oldı. Rusiye Tahqiqat komitetiniñ malümatına köre, patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi». Şeerniñ Rusiye akimiyeti facia neticesinde 21 insan elâk oldı, dep bildirdi.
