Rusiye, Stockholm akemliginiñ qararına köreUkrainağa üç milliard dollar ödemege razı oldı, dep bildireler Reuters agentligi ve Rusiye kütleviy haber agentlikleri öz menbalarına esaslanıp, dep haber ete Azatlıq Radiosı.
Olarnıñ malümatına köre, bu ödev Rusiye ve Ukraina arasında gaz tranziti muzakereleriniñ neticeleri boyunca añlaşmanıñ bir qısmı olmalı.
«Naftoğaz Ukrayını», Azatlıq Radiosınıñ bu malümatnı tasdıqlamaq ya da red etmek ricasına cevap berip, muracaat yazmağa tevsiye etti.
2018 senesi fevral ayında Stockholm akemligi, «Naftoğazğa» 4,6 milliard dollar berdi, dep bildirdi. Diger dava qararı ve fayızlarnen beraber «Gazprom» Ukraina şirketine 2,56 mlrd dollardan çoq ödemeli. Rusiye bu qararğa itiraz bildire.
Dekabrniñ 19-nda Rusiye prezidenti Vladimir Putin Stockholm akemliginiñ qararından «çıqmaq» ve «er kes içün, hususan Ukraina içün kelişken qararnı qıdırmaq» kerek, dep bildirdi.
Daa evel Ukraina ve Rusiye gaz tranziti boyunca printsipial añlaşmağa keldi, dep haber etildi.
2018 senesi fevralniñ 28-nde NAK «Naftoğaz Ukrayını» şirketi Stockholm akemliginde «Gazpromnıñ» tranzit içün bermegen gaz ivazı davasında Rusiyeniñ gaz inhisarcısı olğan «Gazprom» şirketini yeñgenini bildirdi. «Gazprom», Stockholm akemliginiñ qararına razı olmağanını bildirip, 2019 senesiniñ soñunda bitken añlaşmanı bozmaq niyeti aqqında ilân etti. Mütehassıslarnıñ fikirince, «Naftoğaz» añlaşmanı toqtatmağa istemese, mahkeme esnası yıllarnen devam ete bile.
