Link açıqlığı

Saatnıñ esas haberi

Rusiye SİZOsında COVID-19 tarqaluvı andaki qırımlı mabüsler içün ölüm telükesi ola bile – Denisova


Ukraina Yuqarı Radasınıñ insan aqları vekâletlisi Lüdmila Denisova koronavirus tarqalğan Rostov SİZOsında mahküm etilgen qırımlılarnıñ ayatı içün qasevetlene. Onıñ bildirgenine köre, laf Eskender Abdulganiyev ve Arsen Abhairov aqqında kete.

«Kremlniñ bir çoq mabüsi ve siyasiy esiriniñ sağlıq vaziyeti kritik, koronavirus yuqunçınıñ tarqaluvı olarnıñ ayatları içün telükeli ola bile», – dep qayd etti Ukraina ombudsmeni Facebookta.

Onıñ fikirince, qırımlılar tutulğan SİZOda koronavirus tarqaluvı «karantin tedbirlerine riayet etilmegeniniñ aqibeti ola».

«Mabüslerniñ özünden ve tuvğanlarından istilâca memleketniñ penitentsiar müessiseleriniñ memuriyeti olarnı esas qoruv vastalarınen – tibbiy maska, qolçaq ve antiseptiklerinen temin etmegenine dair muracaatlarını alam», – dep bildire Denisova.

Onıñ malümatına köre, Rusiye penitentsiar müessiselerinde 5000 Ukraina vatandaşından çoq tutula.

«Rusiye insan aqları vekâletlisi Tatyana Moskalkovağa muracaat etip, Ukraina vatandaşlarınıñ aqlarını qorumağa, hususan BM İqtisadiy ve İçtimaiy Şurası tasdıqlağan Mabüslerge yanaşuv esas qaideleriniñ nizamnamesine köre ve Dünya sağlıq teşkilâtı ve 25.03.2020 senesiniñ BM işkencelerniñ ögüni aluv alt komitetiniñ tevsiyelerine emiyet berip, uyğun tutuv şaraitlerini temin etmege ve keyfiyetli tibbiy yardım köstermege talap etem», – dep yazdı Denisova.

O, halqara aq qorçalayıcı teşkilâtlarınıñ vekillerini Rusiyeni «Ukraina vatandaşlarınıñ İnsan aqlarını ve esas serbestliklerini qoruv şartnamesinen kefil etilgen aqlarına riayet etmesine ve bütün siyasiy mabüslerniñ Rusiye esirliginden qaytarmaq içün oña qarşı kene basqı quvetleştirmesine çağırdı».

Ukraina ombudsmeni Moskalkovağa ilk sefer muracaat etmey, amma cevap yoq.

Cumaertesi künü, iyünniñ 15-nde, Qurmandaki «Hizb ut-Tahrir davasınıñ» mabüsleri Eskender Abdulganiyev ve Arsen Abhairov tutulğan Rostov-na-Donu SİZOsı koronavirus tarqaluvı sebebinden bir ayğa karantinge qapatılğanı belli oldı. Dava oturışuvı iyünniñ 29-na avuştırıldı. Bu aqta advokat Nazim Şeyhmambetov bildirdi.

Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.

O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.

2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.

XS
SM
MD
LG