2025 senesi sentâbrniñ başında Rusiye apsinde eñ az 30 qırımlı qadın qanunsız şekilde tutula. Böyle malümatnı Qırımtatar resurs merkezi öz saytında bildire.
Berilgen malümatqa köre, Rusiye koloniyalarında 14 qadın tutula, daa 16 qadın SİZOda buluna.
«Bazıları yıllarnen apiste yata ve ciddiy sağlıq problemleri bar, amma kerekli tibbiy yardım alamaylar. Hususan İrina Daniloviç ve Galina Dovgopola koloniyalarda tedaviylevsiz tutula. Qadınlar erkeklerge köre koloniya şaraitlerine daa zor dayana: tibbiy ve ginekologik baquv yoq, gigiyena vastaları yetmey, maneviy basqı, tuvğanlarınen bağ sıñırlana», – dep aytıla haberde.
Qırımtatar resurs merkezi qayd etkenine köre, Qırımda qadınlar «aşalavğa, memuriy ve cinaiy taqiplerge oğratıla, zorbalıqqa oğray ve hırsızlana». Qırımtatar resurs merkezi «siyasiy sebeplerden tutulğan bütün qadınlarnıñ acele azat etilmesini; işğal etilgen Qırımda qadın aqlarınıñ muntazam sürette bozuvlarını toqtatmasını» talap ete, em de halqara toplulıqtan «Rusiyege basqını arttırmağa» rica ete.
Rusiyede tutulğan qadınlarnıñ tolu cedveli Qırımtatar resurs merkeziniñ saytında bar.
Keçken aynıñ başında Qırımtatar resurs merkezi işğal etilgen Qırımdan yarımada ve Rusiye tahqiqat izolâtorları ya da tüzetüv koloniyalarında bulunğan eñ az 26 qadın aqqında haber etken edi.
Qırımda 2024 senesi baarde ğayıp olğan üç qadınnıñ tutulğanı tasdıqladı. Larisa Gayday, Tatyana Pavlenko (Simonenko) ve Elvira Aboyazova Aqmescitniñ №2 SİZOsında buluna. Qırımtatar resurs merkeziniñ malümatına köre, tutuv sebepleri ve qabaatlavlar Rusiye akimiyeti tarafından aydınlatılmay.
