2023 senesi fevral ayında Rusiye SİZO-sında vefat etken qırımlı Cemil Gafarovnıñ advokatı RF Tahqiqat komitetinden müessise hadimleriniñ areketleriniñ teşkerilmesini istedi.
Qırım.Aqiqatqa malüm olğanı kibi, ariza Rostov vilâyetiniñ Taqhiqat komiteniñ idaresine berilgen. Advokat Gafarovnıñ Novoçerkaskqa etap etilgende Rostov vilâyetiniñ Rusiye Federal ceza hızmeti idaresiniñ 5-nci SİZO ve 61-nci tibbiyet-sanitar qısmı hadimleriniñ areketlerini teşkermesini talap ete.
Bundan ğayrı, advokat Gafarovğa acele tibbiy yardım kösterilip kösterilmegenini teşkermege istey. Cinayet alâmetleri ortağa çıqsa, Yahin qabaatlı şahıslarnıñ mesülietke çektirilmesini istey.
Fevral ayında Qırımlı aq qorçalayıcılar Rusiye tarafından «qırımlı musulmanlar davasına» istinaden mahküm etilgen ve siyasiy mabüs dep tanılğan qırımlı Cemil Gafarovnıñ Rusiye SİZOsında vefat etkeni aqqında bildirdi.
Aqmescit rayonındaki Mamaq köyüniñ sakini Cemil Gafarov dört yıldan berli Rusiye apsinde yattı. Bu yıl yanvarniñ başında Rostov-na-Donu Cenübiy okrugınıñ arbiy mahkemesi «25-niñ davası» olaraq belli cinaiy dava boyunca 13 yılğa azatlıqtan marum etildi. Dava çerçivesinde Rusiye uquq qoruyıcıları 25 qırımlı musulmannı terrorizmde qabaatladı, çoqusı apiske alınmazdan evel faal vatandaş edi, «Qırım birdemligi» cemaat birleşmesi çerçivesinde faal ve vatandaş jurnalistleri olaraq belli edi.
Cemil Gafarovnıñ sağlıq problemleri apiske alınmazdan evel de bar edi. Üçünci derece saqatı edi. Ömür arqadaşı Raziye Gafarovanıñ aytqanına köre, qırımlınıñ dördünci derece büyrek yetersizligi, gipertoniya ve yürek hastalığı bar. O, miokard infarktını keçirdi ve SİZO şaraitlerinde olmağan büyrek dializine ihtiyacı bar edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
