Rusiye Merkeziy saylav komissiyası Devlet Duma saylavlarında bülletenlerniñ 100%-ını sayuv neticelerini derc etti. Parlamentniñ alt palatasına 17 yıl içinde ilk sefep beş firqa keçti: «Yedinaya Rossiya» reylerniñ 49,82%-ını, KPRF – 18,93%, LDPR – 7,55%, «Spravedlivaya Rossiya – Za pravdu» – 7,46% ve «Novıye lüdi» – 5,32% qazandı, dep haber ete «Nastoyaşçeye Vremâ».
Qalğan firqalar Devlet Dumasına keçmek içün beş fayızlı baryerni keçip olamadı. Merkeziy saylav komissiyası soñki neticelerni sentâbrniñ 24-nde tasdıqlamağa planlaştıra. Saylayıcılarnıñ 51,68%-ı rey berdi.
İlk tahminlerge köre, «Yedinaya Rossiya» cedvelge köre tahminen 112 deputat mandatını ala. Bundan ğayrı, olar 198 bir mandatlı okrugda ğalebe qazana. Böylece, umumen «Yedinaya Rossiya» alt palatada anayasa çoqluğını ala (300 mandattan çoq) ve özü qanunlarnı qabul etip ola.
KPRF namzetleri doquz okrugda ğalebe qazana, üçünci yerde «Spravedlivaya Rossiya – Za pravdu» namzetleri buluna, olar sekiz okrugda lider ola. Beş okrugda namzetlerini firqasız köstergenler lider çıqa, eki okrugda – LDPR namzetleri, daa üç okrugda – «Rodina», Partiya rosta ve «Grajdanskaya platformanıñ» birer namzeti.
Rusiyede üç kün devamında rey berüv oldı. Bir sıra qavğa oldı, hususan közeticilerni saylav bölüklerinden çıqarmağa tırıştılar, elektron ve evde rey berüvniñ anomal neticeleri ve muhalifet namzetlerine qarşı kösterilgen «çiftler» bar edi.
«Yabloko» reisiniñ muavini İvan Bolşakov firqası keçken saylavlarnı serbest dep tanımaycaq, dep bildirdi. «Bozuv sayısına baqılsa, saylavlar pek doğru olmadı. O qadar çoq bozuv oldı. Em yañlış malümat berildi, em evde rey bergenlerniñ sayısı pek çoq oldı, em elektron rey berüv, onı alâ daa aydınlatıp olamaylar. Şunıñ içün bu saylavlarnı doğru, adaletli ve raqipli dep adlandırıp olamaymız. Bu saylavlarnı serbest dep tanımaymız», – dedi o.
KPRF sentâbrniñ 20-nde aqşam Moskvanıñ Puşkin meydanında Devlet Duma saylavlarında olğan qalplıqlarğa qarşı miting keçirdi. Oña bir qaç yüz insan qoşuldı.
