Ukrayina telükesizlik hızmeti işğal etilgen Qırımda Novofedorovka civarlarında "Saki" Rusiye arbiy uçaq alanına darbe endirildi, dep esabat berdi. Bu haber müessiseniñ içtimaiy ağlardaki saifelerinde derc etildi.
Darbe ne vaqıt endirildi Ukrayina telükesizlik hızmeti bildirmey.
"Ukrayina telükesizlik hızmeti uçucısızlarınıñ aviatsiya tehnikası olğan aranlarğa beş kere ücüm etkeni tasdıqlandı. İlk malümatqa köre, darbe vaqtında eki aranda Su-30 ve Su-30SM qırıcıları bar edi. Su-30SM olğan anğarda ücümden soñ yanğın çıqtı, bu da nişanğa darbe endirilgenini isbatlay", – dep aytıla haberde.
Bu haberni isbatlaycaq malümat olmadı. Rusiye arbiyleri bir şey izaatlamadı, bir de bir zararlar aqqında bildirmedi.
İyulniñ 1-nde gece Qırımda atış ve patlav sesleri eşitildi. Rusiye akimiyeti Aqyarda ava telükesini ilân etti. Yyerli saifeler abunecilerniñ malümatına esaslanıp, Sarabuz qasabası, Kezlev, Saq rayonı, Kefe ve İslâm Terek rayonında atış ve patlavlar aqqında yazdı.
İyün ayında Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.