ABD Devlet departamentiniñ Ukraina meseleleri sabıq vekili Kurt Volkerniñ fikirince, ABD, Rusiyege Ukrainağa qarşı istilâ ve Qırım işğali bitmese, sanktsiyalar lâğu etilmeycegini añlatmalı. Bu aqta o, Amerikanıñ Avropa siyasetini talil merkezi teşkil etken forumda ayttı, dep haber ete «Amerikanıñ Sesi».
Volkerniñ aytqanına köre, ABD, Rusiye ile muzakerelernen oğraşacaq, Almaniya ve Frenkistan ile çalışacaq, Washington siyasetine qol tutacaq, NATO ve AB, Kanada ve Büyük Britaniya ile çalışacaq Ukraina meseleleri mahsus elçini tayin etmeli.
Onıñ qayd etkenine köre, bu işniñ esas vazifesi Rusiyege qarşı sanktsion rejimni devam ettirmektir.
«Rusiye, Ukrainada barışıqqa keder etse ve Qırımdan ketmese, sanktsiyalar qalacağını körer», – dep bildire Volkerniñ aytqanlarını «Amerikanıñ Sesi».
O, «rusiyeliler arasında Ukrainağa qarşı istilânıñ fiyatını Putin içün arttırmaq» müim ola, dep qayd etti.
Kurt Volker Qırım.Aqiqatqa intervyü berip, Rusiye ile Qırım mevzusında halqara muzakere imkânını körmey, dedi.
Kurt Volker 2017-2019 seneleri ABD Devlet departamentiniñ Ukraina meseleleri mahsus vekili edi. O, Ukrainağa basqı yapqanında qabaatlanğan ABD prezidenti Donald Trumpnıñ impiçment esnasında istifağa ketti.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
