Qırımda qayd olğan sakinler ve Rusiye vatandaşları koronavirus tarqaluvı sebebinden memuriy sıñırdaki keçiş noqtalarından esas Ukrainağa şimdilik çıqıp olamaz.
Qırımdaki Rusiye FSBsi Sıñır idaresiniñ matbuat hızmeti bildirgenine köre, vaqtınca çalışacaq yasaq bugün yarı gecede kirsetildi.
Berilgen malümatqa köre, yaqın insannıñ ölümi sebebinden ölüm şeadetnamesi ya da kopiyasını ve soyluq derecesini köstergen vesiqanı bermek şartınen insanlar içün istisna yapılacaq.
Rusiye sıñır idaresiniñ qayd etkenine köre, Qırımda qayd olğan sakinler yarımadağa kire bile.
Rusiye FSBsiniñ sıñır idaresi martnıñ 18-i saat 00-dan itibaren esas Ukrainadan Qırımğa «çetel vatandaşlarını» almay.
Vaqtınca işğal etilgen topraqlarnıñ reintegratsiya meseleleri nazirliginiñ martnıñ 17-nde bildirgenine köre, Qırım ve Herson vilâyetiniñ memuriy sıñırındaki keçiş noqtalarından keçüv aprelniñ 3-ne qadar sıñırlandı.
Ukraina Devlet sıñır hızmetiniñ bildirgenine köre, esas Ukrainada qaydı olmağan vatandaşlar keçirilmeycek.
Ukraina Nazirler şurası martnıñ 18-nde koronavirus tarqaluvı telükesi sebebinden sıñırlavlar vaziyetinde işğal etilgen Qırım ve Herson vilâyetiniñ memuriy sıñırından keçüv qaideleri qararına deñişmeler kirsetti.
Ükümet qararına köre, Qırımda ve esas Ukrainada qayd olmaqtan ğayrı (memleket içinde köçip kelgen şahıs vesiqası olmalı – QA), yarımadağa kirmek ve çıqmaq içün gumanitar sebepleriñ ola bile.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
