Rusiye rejissörı ukrainliler ile Qırım sebebinden dögüşti

Tallinde Rusiyeniñ Qırım işğali aqqında sualni bergen Valentina Baradokvanı ve onıñ ömür arqadışını rejissör Stanislav Govoruhin ile başlığında Rusiye aktörları dögdiler.

Bunı öz Facebook saifesinde ukrain pianinocı Pavlo Gintov yazdı.

«Aqşam musafirhanege qaytqanda, olar insan taqımına rastkeldiler, mında belli rejissör ve «imza qoyğan» Stanislav Govoruhinni tanıdılar. Valentina New Yorkta «imza qoyğan»larnıñ telükesi olaraq belli oldı – o, Georgiyev ve Spivakovnıñ ziyaretlerine qarşı narazılıq numayışlarını teşkil etken edi. Govoruhinni tanıdı, yanına kelip selâmlaştı ve rejissör mezkür mektüpke ne sebepten imza qoyğan edi degen sualni berdi. Govoruhin cevap bermedi, amma Valânıñ sualini rejissörnıñ maiyeti begenmedi. «Faşist», «deağa böyle munasebet kösterilmey», «Qırım er vaqıt rusiyeli edi» degen ibareler ile söz çartışması başladı», – dep yazdı Gintov.

Onıñ sözlerine köre, bunıñ ile iş bitmedi.

«Valâ bir insanda belli aktör Fedor Dobronravovnı tanıdı, işte, o, Genanı boğazından tuttı, daa ekisi onı yerge tüşürip, urmağa başladı. Valâ qarışmağa tırıştı, o da şamar aşadı: qırılğan parmaq – medeniyet erbapları ile körüşüvniñ fiyatı», – dep yaza ukrain pianinocısı.

Onıñ bergen malümatına köre, ücüm köstergenlerniñ sayısı 7 insan edi, ve eger de bunı körgen adam politsiyanı çağırmasa edi, vaziyet nasıl bitecegi belli degil.

«Politsiya belli musafir ile halqara davağa çevirile bilecek problemlerden qurtarılmağa istey. Polis hadimleri dava iştirakçileriniñ sözlerini yazıp aldı, kimseni yaqalamadılar ve «meseleni çezecekmiz» dep vade ettiler, – yaza Gintov. – Valâ öz ikâyesini nevbetteki sözler ile bitirdi: «Çastımızğa, medeniy insanlarnı rastketirdik…».

Ukraina çalğıcısı qırılğan parmaq ve gematomalar ile fotolarnı da yerleştirdi.

Al-azırda Govoruhin Tallinde «Acayip devirniñ soñu» serlevalı filmni çıqara, mında baş rollerinden birisini Dobronravov icra ete.

Mart ayında 85 Rusiye medeniyet ve sanat erbabı «Rusiye medeniyet erbapları – Prezidentniñ Ukraina ve Qırım boyunca mevamına qol tutuvı ile» mektübini imzalağan edi.

Olarnıñ arasında: aktörlar Aleksey Batalov, Sergey Bezrukov, Mihail Boyarskiy, Vasiliy Lanovoy, yırcı Oleg Gazmanov, pianinocı Denis Matsuyev, dirijör Yuriy Başmet ve Vladimir Spivakov, kinorejissörlar Fedor Bondarçuk ve Pavel Lungin, aktör ve kinorejissör Stanislav Govoruhin, Estrada Teatriniñ reberi Gennadiy Hazanov, A. P. Çehova adına MHT bediiy reberi Oleg Tabakov, Zurab Tsereteli ve digerleri.