Qıbrızda Rusiyeniñ S-200 raketasınıñ bölüngen adada, paytaht Lefkoşa yaqınlarında, tüşkeni haber etile, dep bildire Azatlıq Radiosı.
Resmiy şekilde tek Ankara tarafından tanılğan «Şimaliy Qıbrız Türk Cumhuriyetiniñ» Tış işler naziri Kudret Özersaynıñ bildirgenine köre, raketa Suriyeniñ ava mudafaası sistemasından İsrailniñ ücümine cevap olaraq atıldı. O, topraqqa tüşmezden evel patladı, parçaları ise Qıbrıznıñ paytahtı Lefkoşadan bir qaç kilometr mesafede tüşti.
Kütleviy haber vastalarınıñ malümatına köre, raketa patlavından kimse zarar körmedi, lâkin tüşken yeri yaqınlarındaki Taşkent köyünde bir qaç ev çıqqan yanğın sebebinden tahliye etildi.
İyülniñ 1-ne keçer gecesi Suriyeniñ ava mudafaa sisteması İsrailniñ Homs, Aleppo ve Dimaşq şeerleri ücümlerine cevap bermek içün qullanıldı.
Ava darbesi neticesinde, Suriye nezaretçileriniñ bildirgenine köre, Suriye prezidenti Başar Asad tarafında cenkleşken doquz çetel askeri, altı vatandaş, şu cümleden üç bala elâk oldı.
İsrail arbiyleri bu malümatnı izaatlamadı.
Doquz yıldan berli devam etken Suriye cenki 2011 senesi mart ayında narazılıq bildirgenlerniñ ükümet quvetleri tarafından dağılmasından başladı. Zıddiyet neticesinde 370 biñden ziyade insan elâk oldı, millionlarnen kişi ketmege mecbur oldı.
Rusiye cenkte Suriye prezidenti Başar Asadnıñ tarafını tuta.
