Ukraina prezidentiniñ Qırım Muhtar Cumhuriyetindeki temsilciligi işğal etilgen Qırım ve Rusiye akimiyetiniñ areketlerini vatandaşlarnı siyasiy sebepten olğan taqiplerden qorçalağan «advokat ve aq qorçalayıcılarğa qarşı basqı» sebebinden takbih ete.
Bu aqta temsilcilikniñ avgustnıñ 19-nda derc etilgen haberde aytıla.
Müessise, Rostov mahkemesiniñ qırımlı advokat Lilâ Gemecini Bağçasaraydaki «Hizb ut-Tahrir davası» baqılğan «mahkeme oturışuvlarınıñ reglamentini bozğanında» qabaatladı, dep qayd etti.
Temsilcilik, bu dava çerçivesinde aq qorçalayıcılar Seyran Saliyev ve Server Mustafayev taqip etile, dep hatırlattı.
«Advokat aqqı uquqçılarnıñ rolünen bağlı BM esas printsiplerinde insannıñ uquqiy imaye aqqında mevcut. Ükümet advokatlarnı telüke, qorquzuv, qanunsız taqip, müşterilerine maniasız kirüv olmağan imkânlarnı temin etmeli. Rusiye Federatsiyası qırımlı siyasiy mabüslerni qorçalağan advokatlarğa qarşı bu standartlarnı şimdilik boza», – dep qayd etti Ukraina prezidentiniñ Qırım Muhtar Cumhuriyetindeki daimiy temsilcisiniñ birinci muavini Darya Sviridova.
Rusiye tarafı temsilcilikniñ bu malümatına daa cevap bermedi.
Avgustnıñ 11-nde Rostov-na-Donudaki Cenübiy okrugınıñ mahkemesi «Qırım birdemligi» cemaat birleşmesiniñ koordinatorı, Bağçasaraydaki ekinci «Hizb ut-Tahrir davasınıñ» mabüsi Server Mustafayevni mahkeme tahqiqatınıñ soñuna qadar çetleştirdi.
Bundan soñ mahkeme teneffüs ilân etti, er kes vekillerniñ talabınen çıqtı. Advokatlar Lilâ Gemeci ve Yelena Pestovskaya qalğanlar – Mustafayevnen laf etip turğanlar. Mahkeme vekilleri Gemeci ve Pestovskayağa qarşı «mahkeme emirlerine boysunmağanları içün» memuriy protokollar tizdi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
