Rusiye ordusı işğal etilgen Qırımdan daa bir arbiy gemini başqa baza noqtasına avuştıra. Bu aqta Ukrayina Arbiy-deñiz quvetleriniñ spikeri Dmıtro Pletençuk bildirdi.
"Siznen laf etkende, daa bir gemi ava yastığı ile Qırımnı terk etip, diger baza noqtasına kete", — dep bildire spikerniñ aytqanlarını cemaat yayınlayıcısı "Suspilne".
Bu malümatnı Pletçençuk Facebook saifesinde de tasdıqladı. "Rusiyeniñ daa bir gemisi bizim Qırımımızdan çıqışqa doğru areket ete. Run, Forest, run", — dep yazdı o.
Pletençuk qaysı gemi aqqında söz ketkenini aytmadı. Lâkin, açıq malümatqa köre, Aqyarda eki raketa gemisi "Samum" ve "Bora" ava yastığında buluna. Olar Rusiye Qara deñiz flotunıñ 41-nci raketalı kater brigadasınıñ terkibine kireler.
2023 senesi sentâbrniñ 14-nde "Samum" gemisi deñiz pilotsız uçağınıñ ucümine oğradı. Neticede gemini limanğa alıp kettiler.
Muarririyet mustaqil menbalardan malümatnı tasdıqlap olamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
