Qırım ve Herson vilâyetiniñ memuriy sıñırında Rusiye quvetçileri tarafından tutulğan qırımlı faal Vladimir (Abdurahman) Ulçitskiy bir qaç saat devam etken sorğudan soñ yiberildi. Bu aqta Vladimir Ulçitskiyniñ ömür arqadaşı Hatice Qırım.Aqiqatqa bildirdi.
Onıñ aytqanına köre, Vladimir Ulçitskiy Rusiye kontrolindeki «Armânsk» keçiş noqtasında beş saattan çoq tutuldı.
Hatice Ulçitskaya aqayı eki kere tutulğanını ayttı. Birinci kere – saba, saat 11-lerde, aqayı Qırımdan çıqqanda. Er adamnı eki saat tuttılar. Ekinci kere Qırımğa qaytqanda tuttılar. Ülçitskiy pasportını berdi ve Rusiye FSBsiniñ hadimleri olarnen keçmesini istedi. Bu sefer onı saat 14-ten 18-ge qadar tuttılar.
Rusiye quvetçileri Haticeni de 40 daqqa sorğuğa çekti.
«Sualler qorantamız ve şahsen mennen bağlı degil edi, daa çoq siyasiy mabüsler, Qırımdaki faaller aqqında soradılar. FSB hadimleri parmaq izlerini almağa istedi, amma men razı olmadım. Ve telefonımnıñ IMEI-kodunı yazıp alğanlar», – dep tarif etti Ulçitskaya.
Rusiye FSBsiniñ hadimleri Ulçitskiyniñ tutulmasını izaatlamadı.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
