Rusiye işğalci memuriyeti işğalci topraqlarda yaşağan ukrayınalı balalarnıñ zorlap askeriyleştirilüvini devam ettire, dep yaza Amerika cenkni tedqiq etüv institutı (ISW).
«Oktâbrniñ 25-nde Herson vilâyetiniñ Rusiye işğalci memuriyeti bildirdi ki, Skadovsktan 12 mektep talebesi «Rusiye devletiniñ küçüni pekitmege» ant etti ve kadet oldı. Herson vilâyetiniñ işğalci «tasil nazirligi» Rusiye arbiy-vatanperver qıymetleriniñ tarqatıluvında mektep talebeleri arasında kadet areketiniñ tiklengenine yüksek qıymet kesti», – dep haber ete talilciler.
Olarnıñ qayd etkenine köre, Rusiye işğalci akimiyeti ukrayınalı balalarnıñ Rusiyege sürgün etilüvini aqlamaq içün tibbiy infrastrukturanı qullanmağa devam ete. Misal olaraq işğalci quvetlerniñ malümatı kösterile, bıltır işğal etilgen Donbastan 70 bala Moskvağa «ameliyatlarğa» yollanğan eken.
«ISW Rusiye memurları tibbiy ya da psihiatrik ihtiyaclar manaçığınen balalarnı Rusiyege sürgün ete ve olarnı Ukrayınağa qaytarmay, dep qayd etken edi», – dep aytıla haberde.
Ukrayına tarafı bildirgenine köre, Rusiye tahminen 20 biñ ukrayınalı balanı qanunsız bir şekilde sürgün etti. Ukrayına prezidenti Volodımır Zelenskıy ise bu raqamlar daa yüksek, dep ayta.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
