Yanvarniñ 8-nde saba Rusiye Ukrayinağa kütleviy raketa darbesini endirdi. Bir çoq şeerde patlavlar aqqında haber etile.
Harkivdeki patlavlar aqqında şeer başı İgor Terehov yazdı.
''Saba şeerde patlavdan başlana. Daa patlavlat ola bile, er kesni diqqatlı olmağa çağıram", - dedi o.
Harkivge ücüm aqqında malümatnı OVA başı Oleg Sinegubov da tasdıqladı.
Zaporojjâda patlavlar aqqında OVA yolbaşçısı Yuriy Malasko haber etti. Memur şunı da bildirdi ki, Zaporojjâ territoriyası ve vilâyetniñ mesken yerlerine endirilgen raketa darbeleriniñ sayısı ve aqibetleri telüke vaqtından soñ aydınlatılacaq.
Krıvıy Riğ Mudafaa şurasınıñ reisi Oleksandr Vilkul şeerge yapılğan ava ücümleri aqqında yaza. Daa evel Ukrayina Arbiy-ava quvetleri Qırımdan Krıvıy Riğ yönelişinde ballistik raketalar endirilgeni aqqında haber etken edi.
Bundan ğayrı, Hmelnıtskta patlavlar aqqında haber etile.
Yanvarniñ 8-nde saba Ukrayinada ava telükesi ilân etildi. Ukrayina Silâlı quvetleriniñ ava quvetleri qanatlı raketalarnıñ qullanılğanını bildirdi.
Rusiye arbiyleri işğal altındaki Ukrayina topraqlarını, şu cümleden mülkiy obyektlerni muntazam sürette ateşke tuta. Delillerge baqmadan, Moskva bu darbelerniñ maqsadı Ukrayinanıñ arbiy infraterkibi olğanını iddia ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
