Herson vilâyetine qarşı ateşler quvetleştirildi, Rusiye quvetleri eki qat çoq ava bombalarını qullanıp başladı, dep bildirdi Azatlıq Radiosınıñ yayınında Herson vilâyetiniñ arbiy memuriyet vekili Oleksandr Tolokonnikov.
Onıñ aytqanına köre, sentâbrniñ 25-nde saba Rusiye ordusı Herson vilâyetinde Dnipronıñ sağ yalısına darbe endirdi, hususan Mıkolayıvka ve Lvove mesken yerlerine ava bombalarını attı. Tolokonnikovnıñ bildirgenine köre, kommunal hızmetler adise yerine barıp, insanlarğa pencere, qapu ve damlarnı tamir etmege yardım ete.
«Ateşler quvetleştirildi, eki qat çoq ava bombaları qullanıla ve şunıñ içün şimdi şeer sakinleri ava telükesine emiyet bermeli», – dep añlattı Tolokonnikov.
Vilâyetniñ arbiy memuriyet yolbaşçısı Oleksandr Prokudinniñ Telegramda bildirgenine köre, saba Rusiye aviatsiyası Berislavğa ücüm etti, şeerge dört ava bombası atıldı.
«Bir danesi mesken-işletüv binasına tüşti. Şimdilik elâk olğan bir kişi ve yaralanğan bir qaç kişi aqqında belli. Daa bir ava bombası mesken evni yoq etti. Malümat teşkerile», – dep yazdı o.
Aynı vaqıtta Tolokonnikov Azatlıq Radiosınıñ yayınında Rusiye quvetleri Herson vilâyetinde Mıkolayıvkağa ateş açtı ve bundan evel de eñ az sekiz ava bombasını attı. Umumen Rusiyeniñ Herson vilâyetine qarşı ücümi neticesinde sentâbrniñ 24-nde 13 kişi yaralandı, eki insan elâk oldı.
«Umumen 13 insan Rusiye ücümi neticesinde yaralandı, eki kişi elâk oldı. Yedi insan Hersonda, beş kişi Berislavda ve bir insan Lvovede», – dep qoştı spiker.
Rusiye quvetleri sentâbrniñ 24-nde eñ az üç kere Hersonğa ve etrafına ateş açtı. Saba toplarnen, kündüz ve aqşam ava bombalarınen ücüm etti. Hersonda ateş neticesinde 49 yaşında qaravul qadın yaralandı. Bu aqta Herson vilâyetiniñ arbiy memuriyet yolbaşçısı Oleksandr Prokudin bildirdi.
Rusiye ordusı aman-aman er kün Herson vilâyetiniñ işğalden azat etilgen qısmına ve vilâyet merkezine ateş ete. Delil ve şaatlıqlarğa baqmadan, Moskva büyük istilâ başlağanından vatandaş şahıslarına qarşı ücümni inkâr etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
