İşğal altındaki Qırımnıñ Rusiye akimiyeti ve arbiy komandanlıq vekilleriniñ büyük qısmı qorantalarını ve aktivlerini yarımadadan çıqardı. Bu aqta Ukrayına Mudafaa nazirligi Baş istihbarat idaresiniñ vekili Andriy Yusov Azatlıq Radiosı yayınında Qırımnıñ Rusiye akimiyetiniñ Çonğar köprüne açılğan ateşke ve işğal etilgen yarımadanıñ infrastrukturasına qarşı ola bilecek ücümge bergen cevabı aqqında sualgen cevap berip ayttı.
Onıñ qayd etkenine köre, Rusiye quvetleri Qırımdan çıquv imkânlarını baqa.
«Ukrayına Qırımında bir sıra işğalci müessise tahliyege azırlana, Rusiyege ketmek içün vesiqalarnı toplay», – dep tarif etti Baş istihbarat idaresiniñ vekili «Svoboda.Ranok» yayınında.
Onıñ aytqanına köre, Rusiye quvetleriniñ qazğanlarına baqılsa, körüne ki, çoqusı esas Ukrayına sıñırlarına yaqın.
Ukrayına prezidentiniñ Qırım Muhtar Cumhuriyetindeki temsilcisiniñ muavini Denis Çistikov Azatlıq Radiosınıñ yayınında Çonğar köprün qarşı darbeler sebebinden işğal etilgen Qırımda telâş sebebi oldı, dep bildirdi.
İyünniñ 22-nde saba işğal etilgen Ukrayına topraqlarınıñ Rusiye akimiyeti Çonğar köprüne ateş açıldı, dep bildirdi. Rusiyeliler tayin etken Herson vilâyetiniñ işğal altındaki qısmınıñ yolbaşçısı Vladimir Saldo aytqanına köre, Çonğar köprüne Storm Shadow raketalarından ateş açıldı. Rusiyeniñ Tahqiqat komiteti Çonğar köprüne dört raketadan ateş açıldı, dep bildirdi.
Qırımnıñ Rusiye akimiyeti Çonğar yönelişinden areketni Ermeni Bazar ve Perekop keçiş noqtalarına aylandırdı.
Rusiye prezidentiniñ memuriyeti Çonğar köprüne yapılğan darbeni izaatlamadı. «Mudafaa nazirliginiñ meselesidir», – dep qayd etti Dmitriy Peskov.
Rusiye Mudafaa naziri Sergey Şoygu Ukrayına ordusınıñ reberligi Qırımğa HIMARS toplu ateş reaktiv sistemaları ve Storm Shadow qanatlı raketalarınen darbe endirmege planlaştıra, dep bildirdi. O, Ukrayınada «qararlar alınğan merkezlerge qarşı tez darbelerge» yol açılacaq, dep ayttı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
