«Şevçenko rayonındaki mesken komplekske qarşı bir darbe. İlk malümatqa köre, S-300 raketası edi. Yaralanğanlar aqqında malümat alına», – dep ayta o.
Soñra belli olğanına köre, raketa darbesi neticesinde eki insan yaralandı.
«Şimdilik eki yaralanğan kişi aqqında belli – ekisiniñ de cam yaraları bar. Ekimler baqa. Qıdıruv-qurtaruv işleri kete. Bütün hızmetler çalışa», – dep yazdı Terehov.
Harkiv vilâyeti arbiy memuriyetiniñ yolbaşçısı Oleg Sinegubovnıñ aytqanına köre, Rusiye ordusı S-300 raketalarınen Bogoduhov rayonınıñ Zoloçivniñ merkeziy qısmına ücüm etti.
«İlk malümatqa köre – eki S-300 raketası. Memuriy binalar zarar kördi», – dedi memur.
ISW Amerika cenkni tedqiq etüv institutı tahmin etkenine köre, Kreml Harkivge qarşı ava ücümlerinen beraber informatsion operatsiyanı da keçire, böylece bu yönelişte ola bilecek ücümden evel «ukrayınalılarnı qaçmağa» mecbur etecek ola.
Soñki vaqıtları Rusiye ordusı Harkiv ve Harkiv vilâyetinde ücümlerini quvetleştirdi. Şeer yolbaşçısı İgor Terehov bildirgenine köre, Rusiye ordusı Rusiyeniñ Belgorod vilâyetinden S-300 raketasından Harkivge ateş aça – bu snarâdlar 40 saniyede şeerge uçıp kele, lâkin «Şahedler» de sıq-sıq qullanıla.
Rusiye arbiyleri Ukrayina regionlarına çeşit silâlardan muntazam surette ücüm ete. Delillerge baqmadan, Moskva, büyük istilâ başlağanından berli, Ukrayina vatandaşları ve infrastrukturağa nisbeten maqsatlı ücüm olğanını red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
