Dnipropetrovsk vilâyetiniñ arbiy memuriyet yolbaşçısı Serğiy Lısak, ilk malümatqa köre, bir kişi elâk oldı, dep bildirdi.
«Üç insan yaralandı. Ücüm aqibetlerini ögrenemiz. Zarar körgen 6 ev bar. Tafsilâtlar soñra olacaq», – dep qayd etti o.
Ukrayına prezidentiniñ ofis yolbaşçısı Andriy Yermak bildirgenine köre, Rusiye quvetleri Dnipropetrovsk vilâyetiniñ Obuhivka köyünde mustaqil evlerge darbe endirdi, 31 yaşında qadın elâk oldı.
Ukrayına İç işler nazirliginiñ malümatına köre, yaralanğanlarnıñ sayısı 4 insan oldı.
Bundan ğayrı, 8 mustaqil ev yoq etildi. «Qurtarıcı, polis, tibbiy hızmet çalışalar. Yaralanğanlarğa yardım kösterile», – dep bildirdi müessise.
Rusiye arbiyleri, top, toplu ateş raket sistemaları, dron ve raketalarnı qullanıp, Ukrayına şeerlerine muntazam sürette ateş aça. Delil ve şaatlıqlarğa baqmadan, Moskva Ukrayınada vatandaşlarğa qarşı ücüm yapqanını inkâr ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
