Rusiye arbiyleri Donetsk vilâyetiniñ Bahmut şimalindeki ayrı rayonlardan çekile, hususan Voinov-İnternatsionalistov soqağı aqqında aytıla. Bu aqta Ukrayına silâlı quvetleriniñ 57-nci brigadasınıñ istihbarat rotasınıñ komandanı Denis Yaroslavskiy Azatlıq Radiosınıñ «Svoboda Utro» leyhası yayınında ayttı.
«Duşman bu yerlerden, bu emir-közetüv noqtalarından çıqarıldı. Toplar ve mayın atıcı sistemaları pek yahşı çalışa. Er kün ücüm areketleri keçirile», – dep qayd etti o.
Aynı vaqıtta Rusiye quvetleri mayın qoya, dep qoşa komandan, – bunıñ içün tanklarğa qarşı ve piyadege qarşı mayınlarnı qullana.
«Añlamañız içün: bölük bir gecede 100-den 200 mayınğa qadar keçe bile. «Zemledeliye» türlü maşinalarnı qullansalar, bu semerelik qat-qat arta», – dep qoştı Yaroslavskiy.
Ukrayına Silâlı quvetleriniñ Baş ştabı Bahmutta ilerilev tafsilâtlarını daa bermey. Uruş areketleri köz ögüne alınsa, muarririyet başqa menbalarda malümatnı teşkerip olamay.
Ukrayına Mudafaa nazirliginiñ malümatına köre, Bahmut yönelişinde ücüm areketleri keçken aftanıñ soñundan devam ete – Ukrayına arbiyleri er kün ileriley.
Aynı vaqıtta, mudafaa naziriniñ muavini Ğanna Malâr añlatqanına köre, Bahmutnıñ işğalden qurtaruv esnasını zorlaştırğan bir hususiyeti bar – o yerde inkişaf etken müendislik inşaatları sisteması ve Rusiye ordusı vaqtınca zapt etken istinat noqtalarınıñ ağı bar.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
