Rusiye quvetçileri Qırımda Ukrayina Mudafaa nazirliginiñ Baş istihbarat idaresi ile işbirlikte bulunğanında qabaatlanğan eki adamnı yaqaladı. Bu aqta Oraqnıñ 2-nde Rusiye kütleviy haber vastaları Rusiye FSB-si cemaat alâqaları Merkeziniñ malümatına esaslanıp bildire.
1968 ve 1986 senesi doğğan erkekler Qırım yarımadasında Rusiye arbiy obyektleriniñ ve kritik infrastrukturasınıñ bulunması ve Keriç boğazından keçken demiryol trenleriniñ areketleri aqqında malümat toplap, Telegram vastasınen yollağanları iddia etile.
Bundan da ğayrı, Rusiye quvetçileri, erkekler, patlayıcı maddeni demir yolğa qoymaq içün, gizli yerden el yapma patlayıcı cihazını almağa tırışqanlarını iddia eteler.
Tutulğanlarnıñ adları ve soyadları aydınlatılmay. Rusiye FSB-si iyülniñ 2-nde tevqif videolarını derc etti, anda tutulğanlardan biri olaraq kösterilgen, yüzü körünmegen bir adam, Rusiye quvetçileri tarafından seslendirilgen versiyanı kamerağa tekrarlay ve 2024 senesi Boşta SVU-nı almağa tırışqanda tutulğanını qoştı. Bu video basqı altında yazılğan ola bile, Rusiye FSB-siniñ aytqanlarını ise cenk şaraitlerinde alternativ menbalar yardımınen teşkermek imkânsızdır. Ekinci adamnıñ izaatları şimdilik yoq.
Erkekler Rusiye Federatsiyası Ceza kodeksiniñ 222.1 maddesiniñ 3-ünci qısmı (bir gruppa şahıs tarafından patlayıcı maddelerniñ satın alınması ve saqlanması) ve 275 maddesine istinaden (Devlet hainligi) qabaatlana.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı olğan qırımlı bloger Aleksandr Talipov öz telegram kanalında Ukrayinağa qoltutqan Qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar RF ordusını "areketsizleştirgenleri" içün yaqalana ve memuriy ve cinaiy mesüliyetke çekile.