Qırımlı uquq qoruyıcı Lutfiye Zudiyevanı Rusiyeniñ "Ekstremizmge qarşılıq kösterüv merkezi"nden yiberdiler, dep haber ete "Gratı" neşri.
Oña qarşı eki memuriy protokol tizildi. O, "kütleviy haber serbestligini qullanğan" eken. Birincisi, Zudiyevanıñ Facebook saifesinde ''Hizb ut-Tahrir'' diniy areketiniñ Rusiyede terroristik teşkilât olaraq tanılğanını qayd etmegeni, ekincisi ise, ''Azatlıq Radiosı''nı çetel agenti olaraq qayd etmegeni içün.
''Gratı'' qayd etkenine köre, Rusiye qanun qoruyıcıları jurnalistni, sorğuğa çekip onıñ qaysı muarririyetlernen işbirlik yapqanını bilmemege tırışqanlar.
Mahkeme oturışlarınıñ künü ve saatı daa belgilenmedi.
Hatırlatamız, saba Canköyde uquq qoruyıcı ve "Qırım birdemligi" faaliniñ Lutfiye Zudiyevanıñ evinde tintüv keçirildi. Bundan soñ qadınnı Aqmescitteki "Ekstremizm ile küreş merkezi"ne alıp ketkenler.
Zudiyevanıñ evinde keçirilgen tintüv devamında telükesizlik hadimleri video nezaret registratorını, bütün telefonlarnı, flash-disklerni ve noutbuknı tutıp alğanlar. Berilgen malümatqa köre, tintüv yerine advokatlar Emil Kurbedinov ve Edem Semedlâyev kelgen. Evge kirmege tırışqankar, amma olarnı kirsetmegenler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
