Herson vilâyetinde Rusiye quvetçileri tarafından hırsızlanğan ve 2022 senesi Qırımğa çıqarılğan Ruslan Abdurahmanovnı Rusiyeniñ Tambov vilâyetindeki apishanesinden etap ettiler, amma üç aftadan berli kimse onıñ ne yerde olğanını bilmey, onıñnen bağ yoq. Bunı Qırım.Aqiqatqa onıñ ömür arqadaşı Feride Donbayeva bildirdi .
Bugün, fevralniñ 12-nde, Ruslan Abdurahmanov 34 yaşını toldura. Abdurahmanovnıñ eki küçük qızı bar. Bu, onıñ apishanede üçünci doğğan künü. Donbayeva, ömür arqadaşı Noman Çelebicihan adına batalyonda iştirak etkeni içün makeme ükmü boyunca tutulğan Tambov vilâyetindeki apishaneden çıqarılğanını advokatlardan bildi.
Abdurahmanovnı Rusiye quvetçileri 2022 senesi baarde Herson vilâyetiniñ Azovskoye qasabasında yaqaladı. Noman Çelebicihan batalyonında iştirak etkeni içün Rusiye makemesi tarafından beş yıl sert rejimli koloniyada qalmasına maküm etilgen Abdurahmanov da Rusiye quvetçileri tarafından işkencege oğratılğanı aqqında tarif etti. Aq qorçalayıcılar Abdurahmanovnı siyasiy mabüs olaraq tanıdı.
2023 senesi noyabr ayında Abdurahmanovnı Rusiye Federatsiyasınıñ Tambov vilâyetindeki Miçurinsk şeerindeki 5-nci tüzetüv koloniyasına etap etkenleri aqqında haber etilgen edi.
Keçken sene noyabrniñ soñunda Rusiye mahkemesi tarafından maküm etilgen Ruslan Abdurahmanovnıñ sağlıq vaziyeti fenalaşqanı aqqında haber etilgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
