Rusiye quvetçileri Emil Kurbedinov ve İslâm Velilâyevni saba Canköy rayonında keçirilgen tintüvlerden soñ yaqalanğan qırımtatarlar ile körüştirmeyler. Bunı advokat Emil Kurbedinov Qırım.Aqiqatqa bildirdi.
"Al-azırda men İslâm Velilâyev ile FSB binası (Aqmescitte - QA) yanındam. Davağa qatılmamızğa izin bermegen tahqiqatçı, Canköy rayonı ile bağlı başqa cinayet davasında advokat olğanımız içün bu davada imayeci olamaycağımıznı bildirdi. Bu, advokatlarnı davadan uzaqlaştırmaq içün daa bir ıntıluvdır", - dedi Kurbedinov.
Yanvarniñ 24-nde işğal etilgen Qırımnıñ Canköy rayonında Rusiye quvetçileri qırımtatarlarnıñ evlerinde tintüv keçirdiler: Nemse Canköy köyünde (Blijnegorodskoye) Ekrem Kroşnıñ evinde, Timofeyevka köyünde Ayder Asanov ve Refat Seydametovnıñ evlerinde, Çoqraqlı Şeyh Eli köyünde Osman Abdurazakovnıñ evinde, Canköyde Löman Zekiryayev ve Halil Mambetovnıñevlerinde.
Qırımnıñ şimalinde yaqalanğan qırımtatarlarnı "terrorcılıq" ile qabaatlay bileler. Bunı "Qırım birdemligi"ne yaqalanğanlardan biri olğan Ekrem Kroşnıñ ömür arqadaşı Amide bildirdi.
2022 senesi dekabrniñ 15-nde, Canköy rayonınıñ Avuz Qırq (Medvedevka) köyünde qırımtatarı Mustafa Murahasnıñ evinde tintüv keçirildi – Rusiye uquq qoruyıcıları «yasaqlanğan şeylerni» qıdırdı. Berilgen malümatqa köre, Rusiye İç işler nazirliginiñ hadimleri Avuz Qırqnıñ sakinine silâ ve narkotik qıdırmağa kelgen eken. Rusiye uquq qoruyıcıları ev saibinen bağlı haber kelgen, evinde «yasaqlanğan şeyler» ola bile eken, dep bildirdi.
2022 senesi dekabrniñ 19-nda işğal etilgen Qırımnıñ Canköy rayonındaki Avuz Qırq köyünde rusiye quvetçileri üç qırımtatarnıñ evinde tintüv keçirgen. Faallerniñ haber etkenine köre, tintüvnler ağa-qardaş Ernest, Marlen ve Amet Ahayevlerniñ evlerinde olıp keçken.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
