Martnıñ 23-nde Qurultay delegatı Mustafa Mustafayevniñ evine Rusiye quvetçileri tintüvnen kelgenler. Bunı "Qırım birdemligi" cemaat birleşmesi haber ete.
"Tintüv bitken soñ onı oğlu ile beraber bellisiz yerge alıp kettiler. Bunı yerli faaller haber ettiler", - dep yazıla bildirmede.
Tintüv sebebi belli degil.
2017 senesi quvetçiler Mustafayevniñ evinde endi tintüv keçirgen ediler. O zaman olar areketlerine sebep kibi oğlu Fahriniñ borcunıñ ödenilmemesini kösterdiler.
Rusiyede ve işğali altındaki topraqlarda Ukrayinağa qoltutqan sakinler taqip etile. Rusiye tarafdarı bloger Aleksandr Talipov Telegram kanallarında Ukrayinağa qoltutqan qırımlılarnıñ şahsiy malümatını derc ete. Talipovnıñ şikâyetleri neticesinde qırımlılarnı Rusiye ordusını "itibardan tüşürgeninde" qabaatlap, memuriy ve cinaiy mesüliyetke çekeler. Ukrayina prokuraturası Talipovğa qarşı "milletlerara nefret doğuruv" maddesine istinaden cinaiy tahqiqat başlattı.
Rusiye Qırımnı işğal etken soñ, FSB yarımadada muntazam surette insanlarnı tutıp ala, tintüvler keçire, mustaqil jurnalist, qırırmtatar faalleri, muhalefet ve Ukrayina tarafdarı olğan cemaat erbapları ve diniy azlıqlarnı teşkil etkenlerni sorğulay. Uquq qorçalayıcılar rusiyeli küç hadimleriniñ işbu areketlerini siyasiy ceetke esaslı dep tanıy.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
