Martnıñ 6-nda Sudaqta Rusiye quvetçileri qırımtatar Edem Murtazayevniñ evinde tintüv keçirgenler, bundan soñ o ömür arqadaşı ile beraber yaqalanıp, Aqmescitteki Rusiye Federal telükesizlik hızmetiniñ bölügine ketirilgen. Daa soñra onı yibergenler.
Qırımtatar Milliy Meclisi reisi Refat Çubarov Murtazayev işğal etilgen Qırımda Bazarçıq qasabası civarındaki "Aqmescit" stantsiyasına 12 kilometr uzaqlıqtaki demiryolnıñ bir qısmını patlatuv ve zarar ketirüv şübesi ile yaqalanğanını bildirdi.
"Aqşam saat 21:00 raddelerinde, Sudaqta qırımtatar Edem Murtazayevniñ evine silâlı adamlar sürip kirdiler. Bundan soñ ücüm etkenler ev saibi Edem Murtazayevni ve onıñ ömür arqadaşını maşnağa oturtıp, bellisiz tarafqa alıp kettiler. Rusiye quvetçileriniñ istilâsı ve evdeki areketleri, evge qoyulğan uzaqtan telükesizlik kameraları tarafından qayd etildi. Malüm olğanı kibi, Edem Murtazayev Rusiye Federatsiyası Ceza qanunnamesiniñ 281.1-nci maddesiniñ 1-nci qısmı ile "Diversiya faaliyetine yardım etüv" qabaatlana", - dep yazdı Çubarov.
"Qırım birdemligi"niñ malümatına köre, gece saat 2-lerde Murtazayev Rusiye FSB-si tarafından sorğulağan soñ evge yiberilgen.
Daa evel Rusiye FSBsi Bazarçıq (Poçtovoye) köyünde demiryolğa ketirilgen zarar sebebinden Bağçasaray rayonınıñ Priyatnoye Svidaniye köyünde Cemilovlar ailesiniñ evini tintken edi.
Fevralniñ 23-nde aqşam Bağçasaray rayonında kimligi belli olmağan insanlar demiryolğa zarar ketirdi. Neticede trenlerniñ areketi toqtatıldı.
Qırımda Rusiye uquq qoruyıcılarınen işbirligi yapqan Rusiye tarafdarı bloger Aleksandr Talipov adiseni «diversiya» dep adlandırdı. Onıñ malümatına köre, «patlav olmadı, qaynaqnen çalışıp, bir qısmını kesip alğanlar». O, «şübheliler belli, operativ tedbirler keçirile», dep ayttı. Rusiye uquq qoruyıcıları adiseniñ sebepleri aqqında bir malümat bermedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
