Rusiye quvetçileri Yalta sakinini devlet hainligi ile qabaatladı, çünki o, Ukrayina Silâlı quvetlerine para yollağan edi, dep bildire Rusiye kontrolindeki Qırım prokuraturası.
Tahqiqatnıñ malümatına köre, 34 yaşındaki qırımlı 2023 senesi aprel ayında Dublinde bulunıp, çetel bankı vastasınen Ukrayina Silâlı Quvetleriniñ destegine para yollağan edi.
"Qadın para Rusiye Silâlı quvetlerine zarar ketirmek içün qullanılacağını añlay edi", — dep aytıla haberde.
Prokuraturanıñ matbuat hızmeti mabüsniñ adını ve soyadını aytmay. Davanıñ diger tafsilâtları da belli degil. Muarririyet Rusiye tarafınıñ beyanatınıñ kerçekligini teşkeremez.
Ğaliba, söz Rusiye İç işler nazirliginiñ Yalta sabıq hadimi Lüdmila Kolesnikova aqqındadır, onı Rusiye mahsus hızmetleri devletke hainlik yapqanında qabaatladı. Resmiy sebep — qırımlı qadınnıñ ukrayin NFT-markasını satın aluvı oldı, onıñ parası Ukrayina arbiy hızmetlerine berildi. Kolesnikovanıñ aytqanına köre, o, sabıq zenaatdaşları tarafından "Rusiye Federatsiyasınıñ Ukrayinağa istilâsı vaqtında Avropağa ketkenini begenmegenleri içün" qabaatlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.