Rusiye ordusı gece uçucısız uçaqlarnı qullanıp Odesağa ücüm etti, viraneler tüşkeni içün zarar körgenler ve yaralanğanlar bar, dep bildirdi vilâyetniñ arbiy memuriyetiniñ reisi Oleğ Kiper.
Onıñ aytqanına köre, ücüm neticesinde 30 yaşındaki erkek yaralandı ve oña anda yardım etildi.
Bundan ğayrı, FVH-niñ ruhiyatçıları yardımğa muhtac olğan beş insanğa yardım ettiler.
"Yıqılğan parçalar neticesinde 11 qatlı mesken evniñ fasadı ve camı, taşlanğan 14 avtomobil ve gaz borusı zarar kördi (yanğın çıqmadı). Bundan ğayrı, yan-yanaşa yerleşken eki beş qatlı evniñ camları zarar kördi", — dep yazdı o telegramda.
Rusiye arbiyleri çeşit silâlardan muntazam sürette ukrayin regionlarına ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
