Odesanıñ liman infrastrukturasına Rusiye raketa ücüminiñ neticesinde dört çetel vatandaşı elâk oldı, dep bildirdi Ukrayina baş nazir muavini, cemaat ve topraqlarnıñ inkişafı naziri Oleksiy Kuleba.
"Tünevin aqşam Rusiye Odesa limanına ücüm etti. Ballistik raketa Barbados bayrağı altında bulunğan MJ PINA gemisine zarar ketirdi. Ne yazıq ki, dört insan elâk oldı — Suriye vatandaşları. Eñ yaş ölgen kişi 18 yaşında edi, eñ büyügi 24 yaşında edi", — dep yazdı o telegramda.
Onıñ malümatına köre, daa eki adam yaralanğan — ukrayin ve suriyeli, olarğa kerekli yardım berile.
Kulebanıñ bildirgenine köre, darbe vaqtında bir vatandaş gemisi Cezairge ihrac etilecek boğdaynı yükley edi.
"Bundan ğayrı, daa bir gemi, iskele, aşlıq saqlav anbarları zarar kördi. Rusiye ukrayin infrastrukturasına, şu cümleden dünyanıñ aşayt havfsızlığını temin etüvde iştirak etken limanlarğa ücüm ete", — dep qoştı o.
Rusiye arbiyleri Ukrayina regionlarına çeşit silâlarnen muntazam sürette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
