Qırımda Rusiye quvetçileri Keriçniñ 29 yaşındaki sakinini tuttı, onı ukrayin istihbaratınen işbirlik yapqanında şübheli sayalar. Bu aqta Rusiye kütleviy haber vastaları Rusiye FSB-siniñ Qırım ve Aqyar idaresine atıf etip bildire.
Qayd etilgenine köre, o, "kritik infrastruktura" obyektleri aqqında malümatnı "raketa darbelerinde qullanmaq içün" Ukrayina mahsus hızmetlerine bere edi. Oña qarşı Rusiye Ceza kodeksiniñ 275-inci maddesine istinaden (devlet hainligi) cinaiy dava açıldı .
"Şubheli Ukrayina Mudafaa nazirliginiñ istihbarat baş idaresiniñ hadimi ile şahsiy bağ qurdı ve müdirniñ avalesine köre, regionnıñ kritik infrastruktura obyektleriniñ vaziyeti aqqında malümat topladı ve duşmanğa berdi. Malümat duşmanğa raketa darbelerinde qullanmaq içün berildi", — dep aytıla beyanatta.
Tutulğan kişiniñ adı ve soyadı aydınlatılmay, onıñ açıq izaatları yoq. Rusiye mahkemesinde qabaatı isbatlansa, oña 20 yılğa qadar apis cezası berile bile. Cenk şaraitlerinde Rusiye quvetçileriniñ iddialarını alternativ menbalar yardımınen teşkermek qıyın. Ukrayina mahsus hızmetleri bu yaqalanuvnı izaatlamay..
Daa evel haber etilgeni kibi, Rusiye Federatsiyasınıñ Cenübiy okrugınıñ arbiy mahkemesi, Rusiye arbiy hızmetçisini patlatmağa tırışqanında qabaatlanğan 30 yaşındaki Aqyar sakinini 17 yılğa maküm etken edi.
Aq qorçalayıcılar, Rusiye quvetçileri tarafından açılğan devlet hainligi, işbirlik ve casuslıq aqqında davalarnıñ sayısı bir qaç qat artacaq, dep tahmin ete. Şimdi FSB bu kibi davalarnı aman-aman er kün aça, 2014 senesine qadar ise yılda 10 dava açıla edi. Ukrayinada büyük istilâ başlanğan soñ devletke iftira aqqında madde Rusiye Federatsiyasında cenkke qarşı çıqqanlar içün eñ populâr maqalelerden biri oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
