Oktâbrniñ 30-nda Rusiye quvetçileri tarafından yaqalanğan ve köteklengen kör faal İgor Nikitenkonıñ gadjetlerini polis hadimleri tutıp aldı, olarnı endi bir aydan ziyade qaytarmaylar, qırımlı internetke çıqıp olamay. Bu aqta Qırım uquq qoruyıcılarından biri bildirdi.
Onıñ aytqanına köre, Nikitenkonıñ bilgisayarı ve smartfonı tutıp alındı.
"Polis hadimleri, bir çoq usulnı körmemezlikke urıp, faalge arsız şekilde davranalar. Kompüter ve smartfon alâ daa qaytarılmadı. İgor Nikitenko Memuriy cinayetler kodeksiniñ 20.3.1, 19.3 ve 17.13 maddelerine istinaden qabaatlana. İnternetke çıqmaq imkânı şimdilik yoq. Şimdi o eski bir tuşlı telefonnı qullana. Bilgenime köre, Rusiye akimiyeti ve uquq qoruyıcıları faalniñ Qırımdaki "Rusiye aqiqatını" açıqtan tenqit etkeni içün çoqtan berli onı qabaatlaylar. Ne yazıq ki, Qırımda aq qorçalayıcılarğa yardım etmek ket-kete daa qıyın, amma Nikitenko ile bağlı vaziyetni közetip, mümkün olğanı qadar areket etecekmiz", — dep ayttı aq qorçalayıcı Qırım.Aqiqatqa bergen izaatında.
Oktâbrniñ 30-nda Rusiye quvetçileri işğal etilgen Qırımda İgor Nikitenkonı tuttılar. Faalniñ tutulması psihologik basqı ve köteklenüv ile keçti.
Qırım uquq qoruyıcıları, ilhaq etilgen Qırımda Rusiye quvetçileri tek gadjetlerni degil de, siyasiy sebepler ile tintüvler vaqtında qırımlı faallerden alınğan vesiqalarnı da qaytarmaylar, dep bildire.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
