Qırımlı vatandaş jurnalisti Rolan Osmanov Rusiye quvetçileri tarafından tevqif etilmesiniñ tafsilâtını aytıp berdi. Bunı "Qırım birdemligi" cemaat birleşmesi haber etti.
Osmanovnıñ sözlerine köre, "E" merkeziniñ hadimleri RF ordusına destek videosını çekmege teklif etkenler.
Qırımda vatandaş jurnalisti, qırımtatar faali Rolan Osmanov "polis hadimleriniñ qanuniy talaplarını yerine ketirmegenine köre" uç künge tevqif etildi. "Qırım birdemligi" cemaat birleşmesi qırımtatar faali "Rusiye Federatsiyası silâlı quvetlerini itibardan tüşürgeninde" ve "polis hadiminiñ qanuniy talaplarına riayet etmegeninde" qabaatlanğanını bildirdi.
"Bu zaman etrafımda daa eki quvetçi dolandı, olarnıñ özünde maska bar edi, olar arqdan maña ücüm ettiler, yıqıp yerge yatqzdılar, ellerime qırmaça bağladılar ve itep mikroavtobusqa oturttılar. Bütün bular pek qaba şekilde edi", - dedi Osmanov.
"E" merkeziniñ hadimleri Rolanğa RF ordusınıñ areketlerini desteklegen video çekmege teklif ettiler, bunıñ yerine oña qarşı protokol tizmemek söz berdiler. Osmanov red etti", - dep yazıla bildirmede.
2021 senesi dekabr ayında Rolan Osmanov o yıl sentâbrniñ 4-nde FSB binası ögünde toplaşuv içün 15 biñ ruble para cezasını aldı. O künü Aqmescit rayonınıñ Biy Tanış (Pervomayskoye) köyünde qırımtatar faali Nariman Celâlnıñ evinde tintüv keçirilgen edi.
2019 senesi aprelniñ 30-nda Rusiye uquq qoruyıcıları Rolan Osmanovnıñ evini tintken edi. Osmanov tutulmağan edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
