Martnıñ 11-inde Rusiye quvetçileri Bağçasarayda ve Bağçasaray rayonında qırımtatarlarnıñ evlerinde tintüv keçire. Bunı "Qırım birdemligi" teşkilâtı bildire.
Faallerniñ malümatına köre, umumen altı ev tintile. Hususan, tarihçı Seitumer Seytumerov, Şükri Seytumerovnıñ, "Qırım birdemligi"niñ streamerleri Amet Süleymanov ve Seydamet Mustafayevnıñ, Rustem Seytmemetov ve Ayder Süleymanovnıñ evlerinde.
"Qırım birdemligi" haber etkeni kibi, rusiye quvetçileri Amet Süleymanovnı "Qırım birdemligi"niñ başqa faali Seyran Saliyevniñ evi yanında video çekkeni içün tutqan ediler. Aqaynıñ bir qaç yürek hastalığı bar.
Faaller derc etken videoğa köre, evlerniñ birisi yanında OMON hadimleri bar, amma olar bir tefsir bermekten vazgeçe.
Şimdilik tintüv sebepleri belli degil. Rusiye quvetçileriniñ resmiy tefsirleri yoq. Qırım.Aqiqat tafsilâtlarnı bilmege tırışa.
