Oktâbrniñ 4-nde Rusiye FSBsi sıñır idaresiniñ hadimleri Qırım ve Herson vilâyetiniñ memuriy sıñırındaki «Armânsk» Rusiye noqtasında 22 yaşında qırımtatar Ahmed Veliyevni dört saattan çoq tuttı. Bu aqta oğlannıñ tuvğanları «Qırım birdemligi» cemaat birleşmesine haber etti.
Qayd etilgenine köre, saat 15:00-larda qorantasına Rusiye keçiş noqtasına kirgenini haber etti. 19:50-lerde bağlanıp, «Rusiye sıñırcıları tarafından tutuldı» ve şimdi «Kalançak» keçiş noqtasına kete», dep bildirdi.
Rusiye FSBsiniñ sıñır idaresi qırımtatarını tutuv sebepleri aqqında bildirmedi.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
