Rusiye quvetçileri qırımlı aq qorçalayıcı Abdureşit Cepparovnı Qırım ve Herson vilâyetiniñ memuriy sıñırında aman-aman bir saat sorğuğa çekti.
Advokat Mammet Mambetovnıñ Qırım.Aqiqatqa bildirgenine köre, Cepparovnı 40 daqqalıq sorğudan soñ yiberdiler.
Advokatnıñ aytqanına köre, Rusiye FSBsiniñ sıñır hızmeti hadimleri aq qorçalayıcığa umumiy sualler berdi: «Maşinası barmı-yoqmı. Markası. Qayda çalışa, nenen oğraşa. Ziyaret maqsadı ve ilâhre. Askerlik. Qayda ve ne vaqıt hızmet etti. Çetelge barmaq niyeti barmı».
Oktâbrniñ 31-nde Qırım ve Herson vilâyetiniñ memuriy sıñırında Rusiye quvetçileri qırımlı aq qorçalayıcı Abdureşit Cepparovnı kene tuttı.
Oktâbrniñ başında Rusiye sıñırcıları Herson vilâyetiniñ memuriy sıñırında «Armânsk» keçiş noqtasında esas Ukrainağa ketken qırımlı aq qorçalayıcı Cepparovnı bir saattan çoq tuttı.
Oktâbrniñ 14-nde Qırımtatar Milliy Meclisiniñ reisi, Ukraina halq deputatı Ahtem Çiygoz Qırım ve Herson vilâyetiniñ memuriy sıñırında Rusiye sıñırcıları qırımlı aq qorçalayıcı Abdureşit Cepparovnı kene tuta, dep bildirdi. Cepparovnıñ fikirince, oña «dosye şekillendirile».
