Dekabrniñ 23-nde Seyitlerde Rusiye polisi Qırım imamı Server Temirkalâyev aqqında “sorğu” ile qomşularına kelgenler. Bu aqta Temirkalâyev “Qırım birdemligine” aytıp berdi.
Onıñ aytqanına köre, polis hadimleri ailesiniñ terkibi ve kâr menbası ile meraqlanğan. Qomşular quvetçilerge issihaneleri olğanı ve qurucılıqta işlegeni, onıñ dört balası olğanı ve apayı hamilelik-loqsalıq tatilinde olğanı, ve onen beraber yetmiş yaşlarındaki qart anası yaşağanı aqqında aytıp bergenler.
Rusiye polisiniñ Temirkalâyevniñ evine ziyaret etmesi ile bağlı açıq tefsirleri yoq.
“Qırım birdemliginiñ” malümatına köre, Rusiye quvetçileriniñ ziyaretleri aqqında endi 30-ğa yaqın kişi aytıp bergen.
Sudaqta Rusiye polisi qırımtatar faali Refat Kamilovnıñ evine kelgen. “Qırım birdemligi” haber etkenine köre, o, 2019 senesi iyül ayında Moskvağa qırımtatarlarnıñ davaları boyunca istinaf mahkemege barğan edi ve Moskva polisi tarafından yaqalanğan edi.
Dekabrniñ 21-nde Sudaqta Rusiye quvetçileri üç qırımtatar faaliniñ evine keldiler –Bekir Müslimov, Seytosman Karaliyev ve Nariman Muyedinov. Bu aqta “Qırım birdemligi” haber etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
