Qırım ve Herson vilâyetiniñ memuriy sıñırında Rusiye quvetçileri qırımtatar milliy areketiniñ veteranı Ayşe Seitmuratovanı tuttı. Bu aqta Qırımtatar Milliy Meclisiniñ reisi Refat Çubarov haber etti.
«Çaplınka keçiş noqtasında… rus işğalcileri 82 yaşında efsaneviy Ayşe Seitmuratovanı, qırımtatarı, sovet dissidenti, jurnalist, tarihçı, qırımtatar milliy areketiniñ veteranını tuttı. Ayşe Seitmuratova ABD vatandaşı ola. 1987 senesi Sovet Sotsialistik Cumhuriyetler Birliginden quvulğan soñ vatandaşlığını aldı», – dep yazdı Refat Çubarov.
Meclis reisiniñ aytqanına köre, Seitmuratova Qırımda yaşay ve Rusiye işğalinden soñ yarımadadan ketmege razı olmadı.
Rusiye küç müessiseleri vaziyetni şimdilik izaatlamadı.
Ayşe Seitmuratova qırımtatar milliy areketiniñ eñ meşur faallerinden biri ola. Onı eki kere apiske alıp mahküm etken ediler.
70-inci yıllarnıñ ortasında yañı apis müddetine oğramamaq içün Seitmuratova ABDne ketmege mecbur edi.
Birleşken Devletlerde Azatlıq Radiosı ve «Voice of America» ile çalışqan, rus, özbek ve azeri tillerinde yayınlar alıp barğan edi.
2001 senesi Ayşe Seitmuratova kimsesiz qalğan qartlar içün Aqmescitte «Qartlar evini» açqan edi, o, bügünge qadar onıñ sermiyasına çalışa.
Milliy areket faaliniñ ayat yolu ve tercimeialı aqqında «Ayşe Seitmuratova. Halqı içün küreş meydanında» maqalesinde oqumañız mümkün.
