Ukraina telükesizlik hızmeti, Rusiye Federal telükesizlik hızmeti «Canköy» keçiş noqtasında Lviv vilâyetiniñ sakinini tutıp aldı, dep bildire.
«Dört saat devamında maneviy ve fizik basqı yapıp, er adamdan uquq qoruyıcı organlarınıñ vekilleri, Ukraina Silâlı quvetleriniñ arbiyleri ile bağlar, bölükleriniñ yerleşüvlerine dair malümat bermesini talap ettiler», – dep aytıla Ukraina telükesizlik hızmetiniñ Facebook haberinde.
Müessiseniñ malümatına köre, Rusiye quvetçileri ukrainalını «mündericesini añlamağan» vesiqanı imzalamağa zorlap, esas Ukrainağa qaytardı.
«Rusiye FSBsiniñ hadimleri maşinası, naqliyat vastasını aydav aqqına dair vesiqaları ve 2000 euro miqdarında paranı aldı», – dep qoştı UTH.
Tünevin işğal etilgen Qırım çıqışında Rusiye FSBsiniñ hadimleri Ukraina vatandaşını tuttı, dep haber etilgen edi. Qırımdaki Rusiye FSBsi sıñır idaresiniñ matbuat hızmeti bildirgenine köre, er adam «yarımadanı amfetamin ile terk etmege tırıştı».
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
