Rusiyeli advokat Nikolay Polozovnıñ bildirgenine köre, Rusiye quvet qurulışları devlet hainliginden şübheli sayğan (Rusiye Ceza kodeksiniñ 275-inci maddesi) qırımlı İvan Yatskinge qarşı «pek çoq maneviy basqı yapıldı».
Yatskin – doğma Qırımnıñ Curçı rayonınıñ Aybar (Voykovo) köyli. 2019 senesiniñ soñunda onı tutıp, Moskvağa alıp ketkenler, dep tarif etti Qırım.Aqiqat mühbirine Polozov.
«Onı birden Moskvağa, «Lefortovo» SİZOsına alıp ketkenler. Avuştırılğanından berli dekabrniñ soñuna qadar onıñ aqqında bir şey belli degil edi. Onı işğal etilgen Qırımda bulunıp, Ukraina devletiniñ menfaatları içün areket etkeninde, Ukraina telükesizlik hızmetiniñ menfaatları içün Qırımda Rusiye quvetçilerinen bağlı Rusiye devlet sırı olğan malümatnı bergeninde qabaatlaylar», – dep ayttı advokat.
Tahqiqat versiyasına köre, Yatskin em Ukraina, em Rusiye vatandaşı ola.
«Onı işkencege oğratmağanlar, amma büyük maneviy basqı yapqanlar. Qorantanıñ bir qısmı Qırımda buluna, büyük zorluqları olacaq, dep vade etkenler. Oktâbrden dekabr ayına qadar bir destek yoq edi, menfaatlarını tayinlengen advokat temsil etti», – dep qayd etti Polozov.
Advokatnıñ aytqanına köre, Yatskinniñ eki çağına yetmegen balası bar, daa bir bala tezden doğacaq.
Rusiye quvetçileri advokatnıñ beyanatlarını daa izaatlamadı.
Qırım.Aqiqat Ukraina telükesizlik hızmetine malümat almaq içün muracaat etti.
TASS Rusiye haber agentligi, qırımlığa qarşı cinaiy dava tafsilâtları «tahqiqat menfaatları içün» aydınlatılmay, dep bildirgen edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
