Yılnıñ başından Qırımda dört teraktnıñ aldı alındı, dep bildirdi salı künü Rusiye telükesizlik şurasınıñ kâtibi Nikolay Patruşev, dep haber ete «İnterfaks».
«Mahsus hızmetler ve uquq qoruyıcılarınıñ ortaq işi (2020 senesi) sekiz terror tarzlı cinayetni, hususan dört terror ücüminiñ aldını almağa imkân berdi», – dep ayttı salı künü Telükesizlik şurasınıñ kâtibi işğal etilgen Qırımdaki milliy telükesizlik meseleleri toplaşuvınıñ videokonferentsiyasında.
Patruşevniñ fikirince, keçken kurort mevsimi vaqtında Qırımda alınğan telükesizlik tedbirleri «regionda cinaiy vaziyetniñ kerginleşmesine, tabiiy ve tehnogek fevqulâde vaziyetlerniñ peyda olmasına yol bermedi».
Patruşev, yarımadada yol qazalarınıñ sayısı eksile, dep qayd etti.
«Yol qazalarınıñ ve anda elâk olğan vatandaşlarnıñ sayısı aman-aman 13% eksildi. Yol qazalarında zarar körgen balalarnıñ sayısı (aman-aman üçte birine) eksildi», – dep bildirdi o.
Daa evel berilgen malümatqa köre, Nikolay Patruşev salı künü Qırımdaki milliy telükesizliknen bağlı online toplaşuv keçire.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
