Avgust ayında Rusiye uquq qloruyıcıları «qırımlı musulmanlar davası» boyunca mahküm etilgen sekiz qırımtatarını azatlıqtan marum etüv yerlerine avuştırdı, dep saydı Qırımtatar resurs merkezi (QRM).
Berilgen malümatqa köre, rusiyeliler Raim Ayvazov, Remzi Bekirov, Abdulmecit Seytumerov, Amethan Umerov, Eldar Yakubov, Seydamet Mustafayev, Remzi Nemetulayev ve Ruslan Asanovnı etap etti.
«Siyasiy mabüslerniñ etapı insaniyetsiz şaraitlerde keçe: kerekli tibbiy yardım yoq, kameralar rıqma-rıq tolu ve bitmegen maneviy ve fizikiy basqı bar. Bu areketler Rusiyeniñ qırımtatarlarğa ve Ukrayinağa qoltutqan bütün yarımada sakinlerine qarşı siyasetiniñ bir qısmı ola, maqsadı siyasiy mabüslerniñ ahlâqiy ruhunı bozıp, cemaat destegini toqtatmaq ola», – dep aytıla QRM haberinde.
Qırımtatar resurs merkezi qayd etkenine köre, rusiyeliler «cemaat apishaneler yanında aktsiyalar keçirmesin ve tuvğanları ve yaqınlarınen bağları olmasın dep, olarnı siyasiy sebeplernen Qırımdan çıqara».
Avgustnıñ 5-nde Rusiye uquq qoruyıcıları tutqan qırımtatar faalleri ve «qırımlı musulmanlar davasınıñ» mabüsleri Abdulmecit Seytumerov, Amethan Umerov, Eldar Yakubov, Seydamet Mustafayev, Remzi Nemetulayev ve Ruslan Asanov Qırımdan Rusiyeniñ Rostov-na-Donu SİZOsına qanunsız bir şekilde avuştırdı.
Avgustnıñ 5-nde berilgen malümatqa köre, Rusiye mahküm etken qırımlı vatandaş jurnalisti Remzi Bekirov Rusiye Federatsiyasındaki Krasnoyarsk SİZOsından çıqarıldı ve Rusiyeniñ Hakasiya Cumhuriyetiniñ paytahtı Abakan şeerindeki №33 tüzetüv koloniyasına etap etildi.
Avgustnıñ 7-nde berilgen malümatqa köre, Hizb ut-Tahrir davasınıñ «ekinci Aqmescit gruppasınıñ» mabüsi, faal Raim Ayvazov Ulyanovsk vilâyetiniñ Dimitrovgrad apishanesinden Rusiye Federatsiyası Arhangelsk vilâyetiniñ İK-21-ge etap etildi.
Qırımtatar resurs merkezi haber etkenine köre, 2024 senesiniñ ilk üç ayında aq qorçalayıcılar sekiz mabüsniñ etap etilgenini qayd etti, aq qorçalayıcılarnıñ fikirince, işğal etilgen Qırımda siyasiy sebeplerden, 4 – qırımtatarlarğa qarşı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
