Qırımda Rusiye uquq qoruyıcıları "devlet hainliginde" qabaatlağan eki er adamnı tuttı. Bu aqta mayısnıñ 14-nde Rusiye kütleviy haber vastaları Rusiye Federatsiyası FSB Cemaat alâqaları merkezine esaslanıp haber ete.
Haberlerge köre, olardan biri – Or Qapı rayonınıñ sakini. Rusiye uquq qoruyıcılarınıñ malümatına köre, o, Ukrayina arbiylerine Rusiye arbiy obyektleriniñ foto, video ve koordinatlarını yollağan edi.
Ekinci tutulğan kişi – Aqmescit sakini. FSB bildirgenine köre, o, Ukrayina sıñır hızmeti içün çalıştı ve Qırımnıñ territorial mudafaa erkânına dair malümat yetkizgen, Rusiye arbiy tehnikasına dair malümat bergen eken.
Tutulğanlarnıñ ad ve soyadları aydınlatılmay, açıq izaatları yoq. Rusiye uquq qoruyıcılarınıñ malümatını teşkermek cenk vaziyetinde zor. Erkeklerniñ qabaatı mahkemede isbatlansa, olarnı 20 yılğa qadar azatlıqtan marum ete bileler.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı Qırımlı bloger Aleksandr Talipov öz telegram kanalında Ukrayinağa qol tutqan Qırımlılarnıñ şahsiy malümatlarını derc ete. Böyle şikâyetlerniñ neticesinde Qırımlılar tutula ve Rusiye ordusınıñ diskreditasiyası içün memuriy ve cinaiy mesüliyetke çekile.
Sabanda "Tribunal.Krımskiy epizod" aq qorçalayıcı leyhası, Irade teşebbüsiniñ qapalı esabatına atıf eterek, ekstremizm ya da terrorizmni aqlağanında qabaatlanıp tutulğan qırımlılarnıñ video sayısı soñki vaqıtları bayağı arttı, dep qayd etti.