Rusiye Tahqiqat komiteti Rusiye ordusını tekrar «itibardan tüşürgen» Aqmescit ryonınıñ sakini tutuldı, dep bildirdi.
«Rusiye ordusını «itibardan tüşürgeni» içün daa evel memuriy mesülietke çekilgen 47 yaşında adam kerekli hulâsalar çıqarmağan. Bu yıl mayıs ayında Aqmescit rayonınıñ Sabla (Partizanskoye) köyünde yaşağan yerinde bulunıp, Rusiye Federatsiyasında yasaqlanğan içtimaiy ağda Rusiye Federatsiyasınıñ Silâlı quvetlerini «itibardan tüşürgen» malümatnı tekrar paylaştı», – dep aytıla haberde.
Adamnıñ adı ve soyadı aytılmay. İzaatları yoq.
Ukrayına baş prokurorı Andriy Kostin Qırımda 180-den çoq ukrayınalı siyasiy mabüs tutula, 2022 senesi mart ayından berli Rusiye ordusını «itibardan tüşürüv» manaçığınen eñ az 370 insan memuriy mesüliyetke çekildi, dep bildirdi.
Rusiyede ve işğali altındaki topraqlarda Ukrayına tarafdarları taqip etile. Rusiyege qoltutqan bloger Aleksandr Talipov Telegram kanalında Ukrayına tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını «itibardan tüşürgeninde» qabaatlanıp, memuriy ve cinaiy mesüliyetke çekile. Ukrayına prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
