Qırımnıñ Rusiye akimiyeti seferberlik planını yerine ketiremey, dep bildire Ukrayına Milliy tirenüv merkezi.
«Qırım sakinleri seferberlikten qaçıp, yarımadanı terk ete. Arbiyler endi malümat berdi, yerli sakinlerni işğalci ordusına aluv planı yerine ketirilmeycek», – dep aytıla haberde.
Berilgen malümatqa köre, Moskva Qırımdaki Rusiye arbiy komissarlıqlarınıñ reberligini deñiştirmege planlaştıra, çünki yerli hadimlerni sabotajda şübheli sayalar.
Rusiyede yañı seferberlik buyruğı yoq, amma insanlar Rusiye arbiy areketlerine alına. Qırımda yañı seferberlik tedbirleri aqqında malümat peyda ola, balalarğa psihologik tesir quvetleşe.
Avgustnıñ 25-nde Rusiye kontrolindeki Kiyev rayon mahkemesi ögünde semetdeşlerine qoltutmağa kelgen faaller tutuldı. 22 kişi tutuldı. Faal Eldar Aliyev küç qullanılıp tutulğan edi.
Qave ve skverde oturğanlar bile tutuldı, olarnı cemaat nizamını bozğanlarında qabaatladılar. İnsanlar tutulğan soñ arbiy komissarlıqlarğa celpname bermege tırışqanlar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
